இதிலென்ன இருக்கிறது?

சின்னச் சின்ன விசயங்கள்தான்

நம்மை நமக்கும் 

நம்மிடையேயிருப்போருக்கும்

யாரெனக் காட்டுகின்றன.

6 மணிக்கு எழ நினைத்தேன்

6.15ஆகிவிட்டது.

விலகிய போர்வையை இழுத்துப்போர்த்தினேன்.

முகம் கழுவ  ஐந்து நிமிடம் போதாதா?

இதிலென்ன இருக்கிறது?

7.15 பாடம் படிக்க.

பரவாயில்லை, படித்துக்கொள்ளலாம்

விரிந்த விரல்கள் விகடன் எடுத்தன.

8 மணிக்குச் சாப்பாடு

ம்... சாப்பிடுவோம்

எங்கே போகப்போகிறது?

நாட்கள் நகர்கின்றன.

நான் எடுத்த தீர்மானத்திற்கும்

நடைமுறைப்பழக்கத்திற்கும் நடுவே

மாட்டிக்கொண்ட என் சுயம்

பதிலில்லாமல் பல்லிளிக்கிறது.

காலம் தவறுவதோ, கடமையை மறப்பதோ

பெருங்குற்றமல்லதான் - ஆனால்

பெருமாற்றம் நிகழும் மனதில்.

எடுத்த பொறுப்பை முடிக்க நினைக்கையில்

விழுந்து சிரிக்கும் மனம்.

'நீயாவது இத செய்றதாவது'

மற்றவர் சொல்லுமுன் பிதற்றிடும் எண்ணம்.

உன்மீது நம்பிக்கை உனக்கில்லாது போகும்.

விளைவு, 

திட்டங்கள் தீர்மானங்களாகவே இருக்கும்.

உணர்வுக்கு மட்டும் இடமளித்தால்

இழப்புக்கு மேலும் உணவளிப்பாய்

உன்னை ஆள வேண்டியது நீ

உணர்வுகள் அல்ல.