கொசு'று மேட்டர்

மாரியின் வரம் கிடைக்க
காரியம் பல செய்வார்
வரம் வரும் வேளையிலே
வருத்தமே உருவெடுப்பார்.

முதல் மழை ஆகாதென்பார்
முத்து முத்தாய் அம்மை வருமாம்
இருமுறை வந்துவிட்டால்
இறைவனை வணங்கிடுவார்.
மூன்றாம் மழை கொட்டும் நேரம்
முனகல் ஆரம்பிக்கும்
நான்கு நாள் மழை போதும் - நம்மை
நாறடிக்கவும், நாசமாக்கவும்.

ஆயிரம் ஆண்டுகள் முன்
அறிவியல் வளரவில்லை
அறிவிலே வளர்ந்திருந்தோம்.
குளங்கள் தோண்டப்பட்டு
ஏரிகள் இணைக்கப்பட்டன.
வரமாக வந்த மழை நீரால்
யானை கட்டி போரடித்த பூமி நம் பூமி.

அறிவியல் வளர்ந்தும் அறிவு மங்கியது.
குளம் குட்டையானது
குட்டைக்கும் பட்டா வந்தது.
குழந்தைகள் குறைந்தும்
மனைகள் இரட்டிப்பாயின.
வாய்க்கால்கள் குப்பைகுழியாயின
வடிகால்களும் குடிகாடாயின.
கொசுக்களுக்கும் புழுக்களுக்கும்
தினம்தோறும் திருவிழாதான்.

எத்தனை படை பார்த்திருப்பான்?
எத்தனாயிரம் பேரைக் கொன்றிருப்பான்?
எப்பேரரசும் செய்ய முடியாததை
அதுதான் செய்தது.
உலகம் வென்ற அலெக்ஸாண்டரின்
உயிர் எடுத்ததே ஒரு கொசுதான்.

கொசு மேட்டர் ஒன்னும்
கொசுறு மேட்டர் இல்லை.